عوااار قلب

انا خبري بعصير (عوار قلب) لما امدحوليا ووصلو السما وعقبها ذقته ما حسيت بقيمة اسمه لانه حسيته اقل من انه يسمونه (عوار قلب)

لكن هالمرة انا راح اعرفكم على (عوار قلب) من نوع ثاني..

تدرون شنو عاد..

سيــــارة (عوار قلب)

الا وهي الكورفت الي ماني عارفة ليلحين شنو نوعة

اهوا شي ما نزل ليلحين ولا عمري شفته بالصج ولا بالتلفزيون ولا حتى صدفته بقوقل

بس وصلني ايميل بمجموعة صور حقه..يعني صج صج صج (تعور القللللللب)

هذا عوااار قلب ولا بلاااش..خلو العصير عنكم زيييين وتعالو "ذوقو" شكل هالكورفت بحاسة النظر الي عندكم بدال التذوق وحسو بالطعم العجييييب لما تزغلل عيونكم عليييه p:

هااااااااااااااا

اشرااااايكم فيييييييه بس..؟؟؟

بذمتكم مو كفو ينقال عنه (عواااار قلب) ؟؟؟

وتحياتي..

عيد الام مع i can

مممم هالمرة راح اكتب لكم اغنية انا مألفتها
وانشالله بيغنيها شخص من ذوي الاحتياجات الخاصة في عيد الام
وانشالله تعجبكم
في كلمات ممكن يشيلونها ويبدلونها على اساس تمشي مع اللحن وجذي بس هاذي النسخة الاصلية :)



حبيبتي والله يا ساكنه بالروح

امي يا اغلى الناس يا شافية الجروح


حبيت اقدملج في يومج هدية

منو يظن حبج بقلبي شوية

صحيح اني عاجز وشوي لج عليه

بس يستحيل اني أكون الضحية


اقدر اعبرلج عن حبي واشواقي

واقدر ابينلج كل الي بأعماقي

خليني اكتبلج واسطرلج اوراقي

وارسم خريطة قلبي ومكانج الساقي


اقدر شعاري الي عطاني الدافع

اني ابين للناس انا بعد نافع

ما همني اني ناقص لا ما راح اتراجع

همي ايماني بالله وبقربج اتواضع


آريا الي ترعانا وتلبي ندانا

عسا الله يثبتها بمسلكها ويانا

ما قصرت والله جزاها خلانا

نمحي كلمة محتاج ونعدل مستوانا


طبعا بس علشان شغلة مو عارفينها ابينها..كلمة (اقدر) اهيا الشعار الي اهو i can

و (آريا) اهيا القروب الي مصمم هالشعار حق ذوي الاحتياجات الخاصة

وتحياتي..

حديقة النزهة في هلا فبراير

قووووووووة :)

اشلونكم شالاخبار..وشمسوين واشلون هلا فبراير وياكم؟؟عسا مستانسين :)

كل عام وأهل الكويت كلهم بخيييير

طبعا كل شخص أمس قزرها مكان وأمس بمعنا يوم 25 فبراير..

الي راح البحر والي راح صبحان والي الشاليهات والي الخيران وغيره وغيره..

تبون تعرفون انا وين كنت؟؟ كنت بالقرية التراثية الي بحديقة النزهة..

طبعا كان في مهرجان i can للمعاقين ورحت تطوع..

من صباح اللله خير كنا مناك نزهب المكان وجذي..والشمس ماكو اصقع منها(اصقع يعني طقة برود الثلج بس هاذي على عكس p:)

فأشكالنا فلم هندي صارت من الحر والقته لييييييين تعدل الجو على العصاري حزت الساعة 4 ومن المتطوعين بعد كان ويانا شباب الخير وغيرهم طبعا بالأول كان هدوء الجو على ما يو الناس وجذي ودخلو المعاقين (ذوي القدرات الخااصة) وسوولنا جو حلو :)

وعلى الساعة 6 دشت الشيخة فريحة الصباح لانه المهرجان كان برعايتها..

والتهلل ومادري شنو على ما وصلت صوب المسرح.. وبلشو بعض (ذوي القدرات الخاصة) بتقديم ما عندهم من أشياءات مزهبينها لنا وللشيخة.. وكان معاهم اذاعة مارينا اف ام..

بلش الحفل بأغنية من (علي الخليفة ) عن الكويت نسيت شنو اهيا p: ومشالله بدع بددددع وعقبه بلش الشاعر (عبد الرحمن) بإلقاء الشعر عن الشيخ جابر الأحمد وخله عيونه تدمع..الله يرحم شيخنا

وهم قدم شاعر اخر الي هم نسيت اسمه بس الله يعطيه العافية قدم هم قصيدةعن الكويت وعقب هذا وذاك ..

وشوي شوي بلشت زوبعة من الفصلات تهب علينا يمين ويسار مع الاغاني والوطنية وغيرها..

وفصلات على أصوووول معتبره بعد p: وزدها علينا بو الشباب(الريدبول)وخلانا نفصل على سنقه 10 على قوله المصاروة :)

وياهييييي من فصلااااااااات وياهو من تصفق سمراااات وغيرا وغيراا والله يزيد ويبارك كل اغنية عن اغنية فصلة زيادة وكل فرقة عن فرقة على أكثر وأكثر..

بس والله كان جووو ووناسة وضحك وانا وحدة استمتعت بوجودي معاهم.. والله يعطيهم العافية قروب (آريا )الي نظم هالمهرجان ..بصرااحة تعبو وكفو ووفو.. ودمتم سالمين :)

تحياتي..

شرح المكينة

راح اشرح المكينة على حسب الي انا فاهمته..

خنقول احنا عندنا مكينه كامله الحين كل شي فيها محطوط جدامنا
تنقسم هالمكينه حق نصين اللي فوق واللي تحت.. للي فوق يتكون من الروس والثلاجه ..

واللي تحت السلندر

الروس داخلهم سبرنجات وصبابات وروكرات .. عموما بين النص اللي تحت والنص اللي فوق موجوده الصياخ .. الصياخ تدز الروكر بحيث إن الروكر يضغط على السبرنج والسبرنج يفتح الصباب ويدش الخليط وبعدين يتسكر ويحترق الخليط فيكوٌن ضغط ..فيتحرك البستن ويفتح الصباب الثاني تبع الاقزوز وتطلع غازات الاحتراق .. ابسط شي اقدر اقوله

المهم خلصنا من النص اللي فوق

النص اللي تحت يتكون من السلندر..السلندر داخله كرنك مركب عليه ذراع ..ومركب على الذراع بساتن .. والكرنك هم موصل عليه الكام المهم إن الكام مركب عليه تكايات ( لفترات ) المهم هالتكايات شنو محطوط فوقها ؟؟ الصياخ اللي تكلمنا عليهم مساع

وطبعا شنو اللي يحرك التكايات ؟؟ الكام اهو اللي يحرك التكايات.. نسيت اقول شغله بعد .. الكرنك مركب عليه شغله ثانيه واهي طرمبة الزيت ( OIL PUMP ) واللي تشتغل عن طريق الحركه الميكانيكه للكرنك .. يعني مايحتاج كهربا ..
ووو وبس بعد مادري اذا في شي انا ناسيته او انا غلطانه في بعد مادري :) .. اي في شغله نسيتها طبعا بين النص اللي فوق والنص اللي تحت فيه قازقيتات واهيا موانع تسرب .. مايبيلها شرح بعد..وهم بين الثلاجه والراس في قازقيتات وهم بين الراس والهدرز وهم بين السلندر والكارتير .. ( الكارتير اهوا البوكس او الصندوق اللي تحت واللي يشيل الدهن )

وبعد ؟؟ طبعا في بكرة كرنك واهيا البكرة اللي تحت اخر شي بالمكينه .. طبعا الكرنك لما يفتر كل شي ياخذ حركته منه عن طريق البكره .. وظيفة البكره إنها لما تفتر تشغل معاها طرمبة الماي والدينامو وباور السكان وكومبريسور المكيف عن طريق الغايش. و نقدر نركب على بكرة الكرنك السوبرشارجر والبلور ..
وبالنسبه للتلغيم كل شي ينلغم حتى بكرة الكرنك تتغير وتصير اصغر .. وهم بكرات السوبرشارجر والبلور ..

والسلندر ينلغم بحيث يتركب عليه ستروكر
والستروكر عبارة عن تغيير يصير للكرنك والذراع والبستن ..
جني دشيت بسوالف ثانية بس يالله ما عليه افتتاحية بوست ثاني يمكن اسويه عن اللغام p:

وآسفة اذا لجيت راسكم بس لازم تتثقفون شوي
ولازم تطلع مني فايدة p:

تحياتي..

أسئلة يجيب عليها الامام علي (ع)

اسئله غريبه لم تخطر في البال يجيب عليها امامنا وحبيبنا وفخرنا
علي بن ابي طالب صلوات ربي عليه
.................................................. ....
عندما كان الامام علي صلوات الله عليه في جامع الكوفه قام اليه رجل من اهل الشام فقال
ياامير المؤمنين اني اسالك عن اشياء
فقال الامام: سل تفقها ولا تسال تعنتا
'قال الشامي
1-اخبرني عن اول ماخلق الله تعالى؟
قال عليه السلام: خلق النور

2-قال: فمم خلقت السموات؟
قال عليه السلام: من بخار الماء

3-قال فمم خلقت الارض؟
قال عليه السلام: من زبد الماء

4-قال فمم خلقت الجبال؟
قال عليه السلام: من الامواج

5-قال فلم سميت مكه ام القرى؟
قال عليه السلام: لان الارض دحيت من تحتها

6- فساله عن السماء الدنيا مما هي؟
قال عليه السلام: من موج مكفوف

7-ساله عن طول الشمس والقمر وعرضهما؟قال عليه السلام: تسعمائة فرسخ في تسعمائة فرسخ

8-ساله كم طول الكوكب وعرضه؟
قال عليه السلام: اثناعشر فرسخا في مثلهما

9-وساله عن السماوات السبع واسمائها؟
فقال عليه السلام: اسم السماء الدنيا الرفيع وهي من ماء ودخان,واسم السماء الثانيه فيدوم وهي على لون النحاس,والسماء الثالثه اسمها الماروم وهي على لون الشبه,والسماء الرابعه اسمها ارفلون وهي على لون الفضه,والسماء الخامسه اسمها هيغون وهي على لون الذهب, والسماء السادسه عروس وهي ياقوته خضاء,والسماء السابعه اسمها عجماء وهي دره بيضاء.

10-وساله عن الثور ماباله من غاض طرفه لم يرفع راسه الى السماء؟
قال عليه السلام: حياء من الله لما عبد قوم موسى العجل نكس راسه

11-وساله عن من جمع بين الاختين؟قال عليه السلام: يعقوب بن اسحاق جمع بين حبار وراحيل ,فحرم بعد ذلك,فانزل
'وان تجمععوا بين الاختين'

12-وساله عن المد والجزر ماهما؟
فقال عليه السلام:ملك من ملائكة الله عز وجل موكل بالبحار يقال له:رومان,فاذا وضع قدميه
في البحر فاض,فاذا اخرجهما غاض.

13-وساله عن ابي الجن؟فقال عليه السلام:شومان, وهو الذي خلق من مارج من نار.

14-وساله هل بعث الله نبيا الى الجن؟
فقال عليه السلام: نعم, بعث اليهم نبيا يقال له يوسف, فدعاهم الى الله عز وجل فقتلوه

15-وساله عن اسم ابليس ماكان في السماء؟فقال عليه السلام: كان اسمه الحارث

16-وساله لم سمي آدم آدم؟
قال عليه السلام: لانه خلق من آديم الارض

17-وساله لما صار للذكر مثل حظ الانثيين؟
فقال عليه السلام: من قبل السنبله كانت عليها ثلاث حبات, فبادرت اليها حواء فأكلت منها
حبه وأطعمت آدم حبتين, فمن ذلك ورث للذكر مثل حظ الانثيين....
'صححو معلوماتكم يعني مو لان الذكر افضل من الانثى ...لا

.................................................. ..
ملاحظه'الامام عليه السلام اذا قام اليه رجل وساله يقول له ,اسال تفقها ولا تسال تعنتا
لان البعض من الناس كانو يسالون الامام بغرض تعجيزه عن الاجابه
الله اكبر كيف يعجز علي بن ابي طالب وهو الذي يقول
سلوني عن طرق السماء فاني اقرب اليها من طرق الارض

smile & hope

some times...

when all the world stand "against" you...

when you think that your dreams "wont" happen...

when you cross your life way with people that are "not" honest with you...

when your "sadness" become the master of your life...

when your best friend "become" your enemy...

when all people around you think that what are you dowen is "wrong" .. Even you are write...

when you want to forget your problems and "go on" .. then some body comes and cut your wings and let you sink...

when your lover "dies" in front of you..............!!

Always. Draw a "smile" on your face...and "hope" for the best
.....

يه على بالي اكتب هالكلمات الحين ..منها فضفضة..ومنها نصيحة لكم..ومنها تذكير لي.. وانشالله تعجبكم :)

تحياتي..

العيد وسواليفه

اول شي عيدكم مبارك مقدما وعساكم من العايدين ان شاء الله :)

كل ما يي العيد اتذكر اغنية وحدة على طوووووول

(باااريييكوو ياا حباااب...الفرح مادري شنوو وطاااب .. اليوووم يووم العيييد..مادري شنووو ونغني نشيييد ) (اهم شي اني ناسية الكلمات هاذي المفروض تنحفظ صم على انها كل عيد تنحط بقناة الكويت لووووووول ما احس بالعيد الا لما اسمعها مادري ليش لووووووول تراث ترااثp:

ومادري ليش اتذكر يوم البحار لوووول شخباري من امه السفينتين الي قبال بعض ويدزونه فيهم الهنادوه ويغني بإسمك وكله نتهاوش قول اسمي وقول اسمي عاد مادري منو لوووووووول

لاا وقبل العيادي كل واحد يعطونه ربع دينار قاصين علينا مادري نص واذا معطينك دينار يعني بيي لحد يكلمني لوووول بعدين شوي شوي قامو يحسون على دمهم ويزيدون p: والحين ما يصدقون بدا واحد من الي يعايدون يتوظف يقولونله بس انت راحت عليك لووووووووووول

وملاحظة شي بعد..من ما بلشت العيدية تزييد ومبلغها صار بالصاعد الناس قامت تنحاش بالعيد وتهج برا وتسافر لووووووووووووووول والله ما الومهم مساكين المعاش قام يطير على العيادي :)

وطبعا الشي الي ما انساه لما نيمع فلوس العيد وسيييدة العاب الوليد الي بشرق لووووووووووول..متعة العيد كلها مناك ..محد ربحان بالعيد الا هذولي والمطاعم اكتساح يصير عندهم هالفترة لووووول وطبعا اولهم بعد.. زين والوطنية..ماكو مسج ما يندز بالعيد باللسته كلها ورووووووووح p:

وأكره شي عندي بالعيد..

زحمة الشوارع الغثييثة ..وكل مالها كل سنه وتزيد شكلنا على سنه من السنين من مصافط بيتنا بتصير الزحمة ونطلع الفير علشان نوصل المطعم بالليل ونتعشى والغدا يكون عالماشي لوووووووووووول


مو جني حشيت بالعيد وايد :)

بس جذي كافي عليكم p:

واذا في بعد شغلات قديمة نسويها بالعيد ذكروني فيها بالكومينت :)

تحياتي..

من كلماتي 3

كتبتها أيام كان عمري 19

ما حطيت لها عنوان ليلحين متعييزة افكر لووول



ودي أبعثلك من قلبي كلام
يعبر عن إلي داخلي من أحاسيس اتجاهك

ودي أخبرك عن الأحلام
الي حلمتها فيك بوجودك وغيابك

ودي أرسل لك حمامة سلام
تدليك على شوقي وفقداني لهمساتك

ودي أشرحلك عن الغرام
إلي ملكني وحبس أنفاسي بسبة حنانك

ودي يحكمون علي بالإعدام
إذا كنت الكفن الي يلمني في مماتي بحياتك

ودي توصلني من قلبك سهام
تغرز بقلبي أروع شعور من حضرة جنابك

ودي أكون بقلبك الرسام
إلي يرسم كلمة أحبك ويلونها بألوانك

ودي أشيل عنك الآلام
إلي كانت السبب في همومك وعذابك

متى ترجعلي وتخلي الود يصير أرقام
أعددها وأخليها حقيقة بحياتك

وسلامتكم.. :)

تحياتي..

من كلماتي 2

هذا كتبته ايام كان عمري هم 16 :)

العنوان: ولاء

لماذا نهتم في أشياء ... تبعد دائما عن رؤانا

لماذا نعيش في زمان ... شبع منا ورمــــانا

لماذا ننام كل مساء ... كنومة المظلومة المهانه

لماذا نستهين بقطرة ماء ... قد بنت أرضنا وزينت سمانا

لماذا نعذب من أجل داء ... يحدد منه عمرنا ومدانا

لماذا تسقى الأرض بدماء ... كانت بالنسبة لنا أمانة

لماذا يستحال إيجاد دواء ... لبعض الضمائر المدانه

لماذا نرتاح في جنائن ... وغيرنا يموت فدانا

لماذا يبتلى المرء ببلاء ... سببه شهادة زور وبهتانا

هل كل هذا بسبب ولاء ... تكنه الشعوب لشيطانه؟!

أم انه بسبب نداء ... مصدره العيون الفتانة!!

وسلامتكم.. :)

عطوني رايكم؟ وبصراحة ..

تحياتي..

من كلماتي 1

هالكلمات كتبتها لما كان عمري
16


العنوان: لحظة هروب


سئمت من الحياه .. ومع ذلك لدي أمل

أكثرت من الـبــكاء .. ومع ذلك عيوني لم تمل

أكثرت من الصراخ .. ومع ذلك صوتي لم يزل

وأكثر ما أكثرت منه هو الضحك .. ولكني مع ذلك أصبحت مصدرا للهزل

كل هذه المشاعر استخدمت .. للتعبير عن بؤس الحياه .. الذي لا يمكن أن يكون ولو للحظة سهل


وسلامتكم..


عطوني رايكم فيها :)

تحياتي..

تكملة سلسلة الهوايات

في بوست كتبته ذكرت فيه هوايتين من الزليون هواية الي عندي..

الي اهما سوالف السيايير والعزف ..

اليوم بذكر هواية زيادة .. وانشالله اكمل الباجي في بوستات بعدين بالدور .. على قولتهم (تاااته خط العتبة..تاته وحدة وحدة ) لووووول عادي سهالات كل شي دش في بعضا p:

المهم ما علينا (يا كثر ما اطلع من الموضوع وانا اسولف p: )

ثالث هواية عندي الي اهيا شاملة ثلاث هوايات في بعض (كتابة الشعر والاغاني_التلحين_الغناء)

طبعا ليش دخلتهم بهواية وحدة لانه دام اكتب اغاني احب الحنهم وما ينفع الحن وصوتي يكون شي.. فتقدرون تقولون انه صوتي مقبول P:

طبعا هالهواية تطلع اي شي مكبوت وحلوة للشخص الي تلاقي دايما همومه خاشها وما يشوفون منه الناس الا الابتسامة الي شاقة حلجه 24 ساعة والتغشمرالي ما يخلص..وتلاقي من داخل العكس بالضبط.. ف في وايد هوايات اتعبر عن المشاعر المكنونة في الانسان هذا..وتطلعها بطريقة طاقة ممكن الواحد انه يستفيد منها..هم يكون خفف عن نفسه نوعا ما ويحس انه فضفض..

وساعات الواحد يكتب شغلات من كثر ما يشوف بهالدنيا..او من القصص الي تصير..فيطلعها على طريقة شعر وكلمات متناسقة..

في البوست الي بعد هذا انشالله راح اكتبلكم شي انا كاتبته وبعدها متى ما صار ماكو شي وحدة وحدة راح انزلهم مني :)

اما عن الغناء ف اهو هم يعبر عن مشاعر الشخص..الحالية..يعني مثلا بلحن شغلة وانا متضايقة راح يطلع اللحن حزين..,وهكذا(امووت بالثقافة اللغة العربي<<< ماكو شغل )

وطبعا احلى شي لما تتغنى اغنية واكون حاسة باحساسها..الغنا يطلع حدا شي بس اذا انا ما دشيت الموود على قولتهم لو شنو صوتي يكون حلو ماكو فايدة لانه ما راح يوصل المسج عدل للمستمع وتلاقي ما يندمج وياك اذا ما خليته يحس بالاغنية من صوتك..

وهاذي خلصناها وحدة عن ثلاثة :)

وانشالله الايام الياية اكمل هواياتي الي ما تخلص :) (عفية بنية فاضية لووول )

..تحياتي..

لكل شي جهتين..

الملل..

شنو موقعه من الاعراب(داشين حصة عربي حشا)...

شنو اضرارة وشنو فوايده..

كل هذا بجاوب عليه بالمنطق (يمعود اي منطق انتي زين اذا فيج مخ) المهم راح اجاوب بالمنطق الي باقي فيني p:

..من اضراره..

انه الواحد يكره نفسه وده يسوي شي بس الظروف ما تسمحله وبالنسبة للي الظروف تسمحله تلاقي مال حتى من الشغلات الي برا يعني مو القصة قعدة البيت الي مافيها شي لا ساعات حتى الطلعة تكون مملة..

انه الادمي يلجأ للنوم اغلب الوقت علشان يقص الملل وهالشي غلط في اغلب الوقت بس حلاو كله مقزرينها نوم والعطلة بعد تشجع المشكلة..

ساعات من الملل ودك تسوي فلم بالناس ماكو شغل بعد..حرام شنو ذنبهم لوول..

..من فوايده..

ممكن تستغل فكرة انك مو قاعد تسوي شي بإنك تشوفلك هواية يديدة تمارسها وتقضي وقتك فيها..

كلش كلش مالك خلق تسوي شي بس اقل شي تحط في بالك انه الملل دايما وأبدا احسن بوايد من انه يكون عندك مشكلة ويا الاوادم وتقعد تحاتيها ولا حايشك عوار..لما هالشغلتين يحوشونك راح تعرف قيمة الملل اشكثر غالية هالوقت لوووول سألو مجرب :)



الناس نوعين..نوع يفكر باليأس ونوع يفكر بالامل..الي يفكر باليأس دايما يطالع الشغلة من ناحيه سلبيه الي اهيا ناحية الضرر الي فيها..

والنوع المتفائل دايما يطالع الشغلة من الناحية الايجابية..الي اهي النفع..علشان جذي تلاقيهم دايما مستانسين حتى لو صارتلهم مشاكل هدت حيلهم.

بسم الله الرحمن الرحيم

(وعسا ان تكرهو شيئا فهو خير لكم)

صدق الله العظيم


عطوني رايكم واذا عندكم زود قولو بعد :) رمضان كريم p:

تحياتي..

ما تهنيت بالفلم

قووووووووووووة

ادري طولت الغيبة واايد مو شوية :)

وبالاول بقول مبارك عليكم باجي الشهر(حدج تو الناس) فترقيعا للسالفة راح اقولكم عيدكم مبارك مؤخرا p: ولا تزعلون (اشدعوة عليج تزعلون)

المهم انا كنت قايلة اني راح اقول سالفة السينما الي صارت وياي بس كنت متعييزة اقولها..بس اليوم صاير فيني نشاط عاد مادري ليش اني زالطة ماي لين قلت بس قبل الامساك ب دقايق بعد الله اعلم :)

السالفة يا محفوظين السلامة...في يوم ما (اشفيها)

لا لا جد يالله ببلش..مرة كنا داشين فلم ديفداس الهندي اتوقع اغلبكم يعرفه مو؟ اذا مو مو عادي المهم..كنت رايحة ويا خالتي وبناتها

وطبعا تعرفون سوالف الاهل لا تقعدون على الطرف يمكن يكون في صبي على الطرف ومن هالحجي الخزعبلي..فعلى الطرف الاول خالتي قعدت وانا دبسوني بالطرف الاخير وخالتي كانت ناطرة تشوف منو يمي اذا صبي ولا بنت..طبعا اهيا صدف انه يمها بنت..بس موقعها استراتيجي يعني لو شنو ما تغيره..ولما تعبه المكان الي يمي ولا واحد بس الي غط النظر عن خالتي انه وياه وحدة..الفلم طبعا مو مني..يايكم الحجي..

صاحبنا واهوا قاعد كل شوي معدل قعدته ومو عاجبه الكرسي واشكثر يتحلطم....طاف..

المشكلة بندمج ويا الفلم ماكو..وكل شوي قبل لا يصير شي يقول انه بيصير....حلووو الحبيب داش الفلم من قبل وداش الحين يقزرها ويا الي وياه..يعني اكملت..وانا بروحي بدون شي قبل لا اروح فلم اذا خربو علي وقالو نهايته ما اروحله حتى لو حلو لانه حده الحركة بايخة وودك اتنف الي قالك..بس قلت طاف ما قال النهاية شنو قاعد يقولها الشغلات العادية فسكت وماسكه نفسي..

المهم شوي ولا الحبيب يبطل تلفونه ويتعبث فيه وانا طفااارتي هالحركة..والمشكلة التلفون كان بعير(كبير يعني) يعني ليت الشاشة شقني شق..

وهم طااااف اللهم صبرج يا روح..

شوي ولا يطلعوون قلت فكككككه من امه خل اتابع مثل الاواديم..طبعا الي كان داش وياها كانت متحجبة...

ما تهنيت بهالجم دقيقة ولا يرد..لوووول والصدمة ولا الي يمه وحدة مو متحجبة @@ !!!!!

شالسالفة!!..المهم طاف وانا شكو بس ترا شغلة تحير..اهني الفلم يكمل..

صاحبنه مال فبيريح بقعدته ولا يعطيك ذيج القعدة الي راسة على جتف البنية..كيفة انا شكو بس المشكلة مو مني..الاخ داش الجو وشبه انسدح ريوله صارت صوب قعدتي!! اشفيه هذا..يبا سو الي تبي بس بحدود مكانك ماد ريلك عندي شكو..والله ما قلت شي مسكينة صرت مثل الربيانة متكورة ذاك الصوب علشان لا احوشة..بس لما يت اللحظة الحاسمة بعد ما قدرت امسك نفسي..

شنو الي صار؟؟ شنو اللحظة الي طلعتني من طوري؟؟

انا اقولكم.. بنهاية الفلم البطل يموت على عتبة باب حبيبته مثل ما انتو عارفين..جان بو الشباب شنو يسوي ؟؟

خنشوف الحوار الي صار..

الصبي:( قاعد واهوا متكي ) بعد شوي شاروخان بيقعد يشرب بالقطار و يموت على عتبة بابها واهيا ما يخلونها تطلع تشوفه!!!

زوبعة:(خزة قوية الي لاحظ) انت شنو بالضبط؟ (ادري كلام غبي بس الصراحة من كثر الاعصاب الي صارت فيني منه فمادري شنو اقول وطلعت هالجملة لوول )

الصبي:نعم!!

زوبعة:انت اهبل ولا تستهبل يعني وحدة فيهم

الصبي:اشفيج انتي!!(الحين انا الي صرت اشفيج اهم شي )

زوبعة:(بطتها)يعني قاعد مو محترم نفسك..ومو محترم الناس الي حولينك..ومتكي جنه بيت ابوك مو سينما ..كل هذا سكتنا عنه الحين تيي وتخرب علي الفلم..قوم اطلع برا لا اتوحد فيك(لا قوية قوية لووول خربتها ادري)

الصبي:اولله كل هذا خاشته من امساع..وشنو اطلع برا بيت ابوج اهو ماني طالع وجان من اول تكلمتي انا شكو..

زوبعة:صج والله...يعني مو بيت ابوي اقولك اطلع بس بيت ابوك الي تقعد جذي وتخرب علي الفلم وكل شوي مدخلي وحدة@@(امبي مادري اشلون طلعت بس كنت حدي واصلة واهوا يتكلم ابرووود)

الصبي:ويها قام يقط الوان جان يقولي بس سكتي سكتي لا انفضح خلاص بطلع بطلع(لووووووووووووووووووول )

ولي يومكم مادري شمسوي وشلون دخل وحدة بنص الاول والثانية بالثاني!! ومادري شنو قصده بس سكتي لا تفضحيني هل قصده عن ملوت السينما ولا عن البنت نفسها والله ما يندرا

وطبعا مو ذاك الزود انتبهو الناس لانه نوعا ما كنت موطية صوتي بس بنت خالتي الي انتبهت ليش يمي والباجي كانو مندمجين على موت شاروخان وطايحينله بجي وانا المسكينة ما تهنيت بالفلم بس والله طلعت حرتي عدل فيه لووول

بس بذمتكم اذا صار فيكم هالموقف شنو تسوون؟؟ولحد يعلق على الالوان لووول :)

وتحياتي ..

عفية ترقيعه بالمخبا :)

قبل جم اسبوع..

كنت بالسيارة قاعدة اسولف بالتلفون ..

والشارع كان فيه دورية بس من امه سكب..

المهم ولا نزلت التلفون ظليت اسولف عادي ولا كأنه مسويه شي وعند يدي كان..

لين سمعت صوت المايك جيب اسود صفطي يمين(سيارة الوالدة) ..صفطت وطبعا عارفة شنو نوع المخالفة بس ما يشوف شر خشيت التلفون ونطرته لين يه..

واليكم الحوار الي صار:

الشرطي: الاجازة والدفتر (اوف تحوشني قشعريرة من هالجملة لوووول )

زوبعة: خير يا طير على شنو اعطيك بعد هالمرة لا دايسة ولا مبتونة..

الشرطي: بعد عندج سوابق!!

زوبعة: شنو عندج سوابق وين قاعدين احنا شمسوية انا بايقة بنك مثلا !!

الشرطي: لا بس قصدي..(قاطعته لاني وحدة ما اواطن شي اسمه شرطة)

زوبعة: الزبده الحين انا شنو سويت؟

الشرطي: (سكت شوي على هالحركة بعدين جان يقول) عشان كنتي تتكلمين بالتلفون واشكره بعد..

زوبعة: (سويت روحي غبية وجني مو فاهمة شي)انااااا @@ ( يمه منج p: )

الشرطي:اي شفتج بعيني محد قالي كنتي حاطة ايدج على اذونج..

زوبعة: يعني ما يصير احك اذوني مثلا!!

الشرطي:الناس يحكون اذونهم 5 ثواني عشر ثواني مو 10 دقايق..

زوبعة: انا ما صارلي طالعة برا البيت الا 7 دقايق ليش تألف..

الشرطي: (نزل راسه وسكت شوي ويتله الضحكة) تيسري يبه تيسري انا الغلطان حقج علي

زوبعة: يعطيك العافية بس ترا ادري انك شفت التلفون ومطوفني على مزاجك بس ما كان لي خلق اتخالف (جان اقب بسرعة ) لوووووول واطالع صوب المنظرة ولا الشرطي قاعد يضحك علي احسه قال عيارة جذي انا ما شفت لوووووووووول

عاد انتو رقعو حق نفسكم اذا انصدتو لووووول


تحياتي..

من سواليف بني آدم الي مالها معنى :)

اليوم وانا سرحانه وصافنة (كالعادة)<< اشفيها بو كالعادة اخاف عاشقة وانا مادري p:

المهم

يت في بالي شغله...خل نقول انها غريبة شوي...(انزين خلصينا يعني مسوية تشويق مع الوي p:)

الي اهيا..احنا ترى نوعا ما اغبية..او ساعات نسوي سواليف مالها معنا..او بالاصح لما نسويها ونفكر ليش سويناها راح نتوصل حق نتيجة وحدة..الا واهيا انه احنا فينه وشة!!!

ادري الحين كل واحد بينه وبين نفسه يقول طاع هاذي ماكو احد موشوش غيرج بالسالفة p:

تدرون شنو هالشغلات؟؟

..
..

1.تكفون لما بتغير محطة بالتلفزيون مو لما تضغطون على دقمة بالرموت وما يشتغل ترعصون عليها حيل يعني يكون بيتغير شي ولا كلش كلش تطقون الرموت بالقاع (انزين ليش يعني مثلا بيتأدب عقب هالحركة وبيشتغل مثلا لوول )

2.لما بنصعد الاصنصير ونضغط على الزر ويطول على ما ينزل نرد نضغط عليه جم مرة وحيل يعني يالله انزل(يعني مثلا بينزل اسرع اذا لعنت خير الام الي يابته وانت تضغط عليه مثلا؟؟!! ونقول ليش الاصنصيرات تخترب وتوقف علينا خخخخخخ )

3.لووووووووووول هاذي صج فلم..ليش لما يلف احد علينا بالشارع نسفل فيه وفي ناس يطيحون فيه سب وملعن ويطالعونه ويأشرون يعني السب حقك..انزين يعني اهوا اشدراه شنو قاعد تقول انت!! كل الي شايفة ويهك واهوا معفس ومعصب وشفايفك تسولف بروحهم سايلنت لووووول..انا انصحكم علشان اعصابكم لا تروح هدر حطو سماعات لي برا السيارة علشان اي كلمة توصل وتكون مسموعة..(شنو ناوية تسوين جو هوشة فوق ما اهو مشحون الجو بدون صوت لووووووووول)

4.ليش لما تكون ناطر احد تقوم تمشي روحة ردة روحة ردة (يعني مثلا اذا قمت مشيت بييك اسرع)لوووول عادي اعصاب البني ادم بروحها فلم

ليلحين هذولي الي يو على بالي..واذا انتو عندكم زيادة ضيفو وقولولي :)

تحياتي..

تاق من ديكاتي

اول مرة اسوي تاق
حدي ما كنت فاهمة شي بالاول بس مسيري استوعب بالنهاية..الله يخلي شوية المخ الي باقيلي ...تدرون بعد الينون ما يخلي احد بحاله لوووووووووول

المهم قصة التاق هذا انه اجاوب على اسئلة من خلال الأغاني الي مسيفة عندي
بس مو انا الي اجاوب بكيفي..الحلو انه الجواب او الاغنية الي راح تنحط حق الجواب راح يكون من كيف اللاب توب..لانه راح اشغل الريل بلاير على الshuffle فراح تمشي الاغاني بترتيب متخربط والنتيجة ينحطون كل اغنية ودورها على الاغاني.. فسترك يا رب :P
حطيت الشرح المطول حق الي يدش وما يدلي شنو سالفة التاق هذا

The Rules Are :
1. Put Your iTunes/ music player on Shuffle



2. For each question, press the next button to get your answer



3. YOU MUST WRITE THAT SONG NAME DOWN NO MATTER WHAT!!! After you've answered all of the questions, tag 5 other people and then let them know they've been tagged to do them themselves :)

-----------------------------------------------

1.IF SOMEONE SAYS "IS THIS OKAY" YOU SAY?
رويشد-دنيا الوله
(شكو حدا لووول )

2.WHAT WOULD BEST DESCRIBE YOUR PERSONALITY?
ميامي-عاشو
(لوووووووووووووووول من امه)


3.WHAT DO YOU LIKE IN A GUY/GIRL ?
جيتارا-وريني

4. HOW DO YOU FEEL TODAY?

عبدالمجيد-خلاص ابعد
(اهم شي )

.5.WHAT IS YOUR LIFE'S PURPOSE?

جيتارا-صعبة
(بدون تعليق)


6.WHAT DO YOUR FRIENDS THINK OF YOU?

حمود ناصر-حبيبي
(اضبطت هالمرة ;) )

7. WHAT DO YOU THINK OF YOUR PARENTS?

عبد المجيد-انسان اكثر
(قوية لوووووووول يمكن موجهة للوالد خخخ)

8.WHAT DO YOU THINK ABOUT VERY OFTEN?

ميامي-شيلوها شيلة
(لوووووول لا بدعت طلع هذا اكثر شي افكر فيه لووول فصلة طلعت)

9.WHAT DO YOU THINK OF YOUR BEST FRIEND?

نبيل-تسافر
(اي يالله مرقعة شوي كل الكويت مسافرين لوول)

10.WHAT DO YOU THINK OF THE PERSON YOU LIKE?

عادل محمود-اوعدني

11.WHAT IS YOUR LIFE STORY?

نبيل شعيل-جاني
(اهم شي انه قصة حياتي لوووووول ما صارت لي مته واهوا يي لوووول )

12.WHAT DO YOU THINK WHEN YOU SEE THE PERSON YOU LIKE?

سامو زين-اقربي ليه
(لا ما اعبر لووول)(منقص ويهي خخخخخ)

13.WHAT DO YOUR PARENTS THINK OF YOU?

حمود ناصر-زعلان
(لووول غلطانيييين العادة العكس وياه الوالدة لوووول)(الوالد بالاخص خو خارج منطقة التغطية ما منه فايدة خخخ)

14. WHAT WILL YOU DANCE TO AT YOUR WEDDING?

راشد الماجد-كل يوم
(ليييش انزين ليييش يلعن خيرج عرسج هذا مو جنازتج لووول)

15.WHAT WILL THEY PLAY AT YOUR FUNERAL?

نبيل شعيل-راجعلك
(شنو راجعلك شكووو ماتت الآدمية تفاولون على نفسكم لوووول)

16.WHAT IS YOUR HOBBY/INTEREST؟

ميامي-انا الغلطان
(ماكو شغل خلصو الهوايات امشي واتأسف حق الاوادم لووول)

17. WHAT IS YOUR BIGGEST SECRET?

جيتارا-بعد عمري انا
(وا خزياه فضحتونا لوووول..وبحتضر بعد يا سلام..اسمالله علي )

18.WHAT DO YOU THINK OF YOUR FRIENDS?

نبيل شعيل-وش مسوي
(شالعيشة تكفا لووووول) على هالاغاني الي تتركب مع الاسئلة حظي ثلاث ارباعة عوي لووول

19. WHAT SHOULD YOU POST THIS AS?

تامر حسني-يا بنت الايه
(لووووووووووول)

20. WHAT DO YOU THINK OF YOURSELF?

لووووووووووووووووول
ميامي-احلى من الحلوين
لوووووووووووول
لا هالمرة بدع الريل بلايير
يعني حده من ام ابوه (اشفييييييييهاااااااا) لووووول

الي موجه لهم التاق:
طعم السكر
3bady
5roofa
ساخر كويتي
molok

الله يعييينكم وانشاء الله تترقعون بعد لووووول

قصة خلق حواء؟؟!!

يا جماعة الموضوع حدا شي ومتأكدين منه بعد

اقرووه وشوفو شنو فايدة الانثى الي مطيحين من قدرها

حياكم على الموضوع

لم خلقت حواء من اّدم وهو نائم ؟؟

حين خلق الله ادم عليه السلام كان هو أول

بشري وُجد ..

كان يسكن الجنة ..

و بالرغم من كل ما هو موجودٌ هناك استوحش ..

فحين نام خلق الله حواء من ضلعه ..!!!

يا تُرى ماالسبب ؟؟!!...

لِم خُلقت حواء من آدم و هو نائم ؟؟ !!!

لِم لم يخلقها الله من آدم و هو مستيقظ ؟؟!!

أتعلمون السبب ؟؟


يُقال إن الرجل حين يتألم يكره،

بعكس المرأة التي حين تتألم تزداد عاطفةً و

حباً !!...

فلو خٌلقت حواء من آدم عليه السلام

وهو مستيقظ لشعر بألم خروجها من ضلعه و

كرهها،

لكنها خُلقت منه وهو نائم ..

حتى لا يشعر بالألم فلا يكرهها ..

بينما المرأة تلد و هي مستيقظة ،

و ترى الموت أمامها ،

لكنها تزداد عاطفة ..

و تحب مولودها ؟؟

بل تفديه بحياتها ...

لنعدْ إلى آدم و حواء ..

خُلقت حواء من ضلعٍ أعوج، من ذاك الضلع

الذي يحمي القلب ..

أتعلمون السبب ؟؟

لأن الله خلقها لتحمي القلب ..

هذه هي مهنة حواء ..

حماية القلوب ..

فخُلقت من المكان الذي ستتعامل معه ..

بينما آدم خُلق من تراب لأنه سيتعامل مع

الأرض ...سيكون مزارعاً و بنّاءً وحدّاداً و

نجاراً ..

لكن المرأة ستتعامل مع العاطفة ..

مع القلب ..

ستكون أما ًحنوناً ..

وأختاً رحيماً ..

و بنتاً عطوفاً ...

و زوجةً وفية ..


خرجنا عن سياق قصتنا ..

لنعدْ ....

الضلع الذي خُلقت منه حواء أعوج !!!!

يُثبت الطب الحديث أنه لولا ذاك الضلع لكانت

أخف ضربة على القلب سببت نزيفاً ،

فخلق الله ذاك الضلع ليحمي القلب ..

ثم جعله أعوجاً ليحمي القلب من الجهة الثانية ..

فلو لم يكن أعوجاً لكانت أهون ضربة

سببت نزيفاً يؤدي – حتماً – إلى الموت ..

لذا ...

على حواء أن تفتخر بأنها خُلقت من ضلعٍ

أعوج ..!!

و على آدم أن لا يُحاول إصلاح ذاك

الاعوجاج ،

لأنه و كما أخبر النبي صلى الله عليه و سلم ،

إن حاول الرجل إصلاح ذاك الاعوجاج

كسرها ..

و يقصد بالاعوجاج هي العاطفة عند المرأة

التي تغلب عاطفةالرجل ...

فيا ادم لا تسخر من عاطفة حواء ...

فهي خُلقت هكذا ..

و هي جميلةٌ هكذا ..

و أنتَ تحتاج إليها هكذا ..

فروعتها في عاطفتها ..

فلا تتلاعب بمشاعرها ..

و يا حواء ، لا تتضايقي إن نعتوكِ

بناقصة عقل ..

فهي عاطفتكِ الرائعة التي تحتاجها الدنيا

كلها ...

فلاتحزني.....

أيتها الغالية ....

فأنتِ تكادِ تكونين المجتمع كله ..

فأنتِ نصف المجتمع الذي يبني النصف الآخر

ججك ججك جك ..والله حجي يسوا ذهب :)