حتى البدليات قمنا انصنفها

بسولف اليوم عن البدليات...

الي ما يفهم بالقير العادي خل يعدي اول فقرة..

كلمة بدلية يايه من بدل يعني روووح اول ثاني..الي بعدو ثاني ثالث..وهكذا..بس تبديلة عن تبديلة تفرق..يعني الي يبدل واهوا سياقته عادية مو قاعد يدوس..غير عن الي يبدل واهوا دايس تبديل سريع...غير عن الي يبدل واهوا يلكش..ووحدة عن وحدة تفرق..يعني مو كل واحد يلكش ينقال عنه لكيش..لكش عن لكش يفرق..ومو كل واحد ساق قير عادي قالو عنه يعرف يسوق عادي..لانه تبديل عن تبديل يفرق..الحوسة هاذي كلها علشان اقول شي واحد بس..

بدلية عن بدلية تفرق!! اشلون يعني..

انا اقولكم..

المقصد انه للبدلية انواع(دشينه حصة قواعد..شخباااريي) :

النوع الأول..الي اهوا تبديل كلمة بأحرف الكلمة الثانية الي معاها بالجملة بس على نفس وزنها اهيا ..فاتصير الجملة فلم نكتة :)

مثال..ايام الثنوية..كنت بروح اييب حق البنات سفن آب..يوم ييت بعطيهم..كان في وحدة منهم اسمها جميلة..ياية ابي اقولها (جميلة تبين سفن)..جان اقول( سفينة تبين جمل)!!!! لوووول من امه..يعني الصدف بعد تلعب دور الي البدليات انقطت بكلام صح نظريا بس بجملة موقعها من الفهم غلط عمليا(انقلبت حصة علوم) حشا الي يشوف التعليقات ملوت الحصص يقول هاذي ليلحينها بالثنوية لوول :)

النوع الثاني..الي اهوا كله على بعضه غلط من ام ابوه هالمرة..يعني لا معنى عملي ولا نظري اصلا ما نسمي هالبدليات كلمة..

مثال..

يعني توا بالمسنجر يايه اقول بضغط جان اقول بغضط..طبعا بالمسنجر البدليات اشكال والوان حرف زايد وحرف ناقص على حسب الحاله..شابك وانت يوعان..نقصت حروف من الكلمة.شابك وانت بتنام ودايخ زادت حروف على الكلمة..

شابك وانت مخك بزليون شي بتطلع كلمه مثل جذي(بالتقصيل الململ)لوووووووووووووووول يعني (بالتفصيل الممل)هاذي امس هم انقطت بالمسنجر مو انا طبعا ..بدلياتي وايد احسن من جذي p:

وآخر نوع..الي اهوا افشل نووووع..واااي يالفشلة الله لا يحط احد بهالمواقف..يعني قصة وي ولا يطلع هالنوع من البدليات جدام احد رزة ولا كبير بالعمر ولا جدام عموم من الناس وبمايك على خشبة مسرح لووووووووووووووووووووووووول..ماني قايله مثال لانه شوي قوية..

بس هالنوع الله يسلمكم لما تبدل كلمتك الي بتقولها بكلمه معناها وصخ ولا سبه بالعربي الفصيح يعني..هاذي وايد تصير ديرو بالكم منها يمعود..

حطيت هالموضوع..لانه نوعي هم وايد اقط بدليات..وخصوصا بعد لو اني قايله هالموضوع بلساني مو كتابة جان ما فهمتو شي بعد ثلاث ارباعة بيكون بدليات ..اشدعوة عليج..بس ماني قايله ليش خلي الطابق مستور على قولتهم :)

تحياتي..